Layung Surup di Cikandang
Manéhna sok ngahajakeun datang ka dinya
nyawang layung nu warnana tetep nu éta
teu ngijih teu halodo konéngna matak kabita
Manéhna teu bosen imut salila layung mulas langit
siga milu bungah nganteurkeun panonpoé nu rék tibra
padahal haténa kawas walungan Cikandang
teu weléh bangreung
Waktu layung leungit di Cikandang
diseuseup hawa burit nu alum
dipiceun deui hawa dibarung geter
Tuluy manéhna lunta
jajap cintana nu weléh teu daék ngarti
mun layung geus diiwat ku sakadang peuting
Dimuat dina majalah Cupumanik/Juni 2007
Posting Komentar